CHANZO CHA MOTO ULIOUNGUZA MADUKA 32 MWENGE CHABAINIKA, RC CHALAMILA ATOA TAARIFA YA AWALI

Mkuu wa Mkoa wa Dar es Salaam Albert Chalamila Disemba 07, 2023 akiwa katika eneo la Mwenge ambalo janga la moto lililotokea na kusababisha kuungua kwa maduka 32, ametoa taarifa ya awali ya uchunguzi wa chanzo cha moto huo.

Amesema moto huo ulisababishwa na kijana mmoja wa kawaida kabisa ambaye alichoma duka moja la Nely Mabegi hatimaye moto ukasambaa kwenda maduka mengine na kusababisha hasara kubwa kwa wafanyabishara wa maduka hayo.

RC Chalamila amesema Jeshi la polisi linamshikilia kijana huyo na kuendelea na Uchunguzi ili kuweza kubaini mnyonyoro mzima wa wahusika, wakibainika wote watafikishwe mahakamani na sheria itachukue mkondo wake.

Aidha RC Chalamila amewataka wafanyabishara hao kuwa watulivu Serikali inafanya kazi yake kwa weledi mkubwa ambapo amelishukuru jeshi la polisi, na vyombo vingine vya dora kwa kazi nzuri

Kwa upande wake, Mkuu wa Wilaya ya Kinondoni Saad Mtambule amemshukuru Mkuu wa Mkoa kwa maelekezo yake ambapo Ofisi yake ya Wilaya ya Kinondoni imemhakikishia kupokea maagizo na kuyatekeleza kwa maslahi mapana ya Umma.